डहाणू-तलासरी पट्ट्यातील गावांना महामार्गाशी जोडण्यासाठी नवीन मार्गाचा प्रस्ताव*

*डहाणू-तलासरी पट्ट्यातील गावांना महामार्गाशी जोडण्यासाठी नवीन मार्गाचा प्रस्ताव*

अनिरुद्ध मिश्रा /​पालघर: पालघर लोकसभा मतदारसंघातील डहाणू-तलासरी भागातील आदिवासी गावांना राष्ट्रीय महामार्गाशी जोडण्यासाठी नवीन रस्ता विकसित करण्याची महत्त्वपूर्ण मागणी खासदार डॉ. हेमंत विष्णू सवरा यांनी केंद्रीय रस्ते वाहतूक आणि महामार्ग मंत्री श्री. नितीन गडकरी यांच्याकडे एका निवेदनाद्वारे केली आहे.
​सद्यस्थिती आणि नागरिकांची गैरसोय:
सध्या डहाणू आणि तलासरी तालुक्यातील बोर्डी, घोलवड, कोसबाड, रामपूर, भिनारी, जांबुगाव, झाई, बोरीगाव, जलवाई, आसवली, खुणवडे, नागबंध, नंगणकस, डोंगरीपाडा (डहाणू), परसपाडा आणि डोंगरीपाडा (तलासरी) यांसारख्या अनेक आदिवासी गावांना राष्ट्रीय महामार्गाची थेट कनेक्टिव्हिटी नाही.
​सध्या या गावातील नागरिकांना NH-48 या राष्ट्रीय महामार्गावर पोहोचण्यासाठी चारोटीच्या दिशेने तब्बल ४२ किलोमीटर, उत्तरेकडे तलासरीकडे ४२ किलोमीटर किंवा भिलाडकडे ४८ किलोमीटरचा वळसा घालून प्रवास करावा लागतो. यामुळे प्रवासाला खूप जास्त वेळ लागतो आणि नागरिकांना अत्यावश्यक सेवा मिळण्यात मोठ्या अडचणींचा सामना करावा लागतो.
​सुचवलेला नवीन प्रस्तावित मार्ग:
या समस्येवर कायमस्वरूपी तोडगा काढण्यासाठी स्थानिक रहिवाशांच्या मागणीनुसार खासदार डॉ. सवरा यांनी खालील नवीन मार्गाचा प्रस्ताव मांडला आहे:
​प्रस्तावित रस्ता: अस्वाली(घाट मार्गातून उत्तरेकडील वळणासह) ते करजगाव (पाटीलपाडा) – धामणगाव – सवणे- वडवली
​अंतर: हा मार्ग अस्वाली ते करजगाव (पाटीलपाडा) दरम्यान ५-७ किलोमीटर आणि धामणगाव ते वडवली दरम्यान ७-९ किलोमीटर लांबीचा असेल.
​नवीन रस्त्यामुळे होणारे फायदे:
हा नवीन मार्ग विकसित झाल्यास परिसरातील आदिवासी गावांना थेट महामार्गाची जोडणी मिळेल:
​वडोदरा-मुंबई एक्सप्रेसवे (अंदाजे १३ किलोमीटर अंतरावर)
​NH-48 राष्ट्रीय महामार्ग (अंदाजे १८ किलोमीटर अंतरावर)
​पालघर जिल्ह्यातील आदिवासी बांधवांचे व्यापक जनहित आणि विकासाची गरज लक्षात घेऊन, केंद्रीय रस्ते वाहतूक मंत्रालयाने या प्रस्तावाची तातडीने दखल घ्यावी. तसेच, योग्य योजनेअंतर्गत या रस्त्याच्या विकासासाठी संबंधित अधिकाऱ्यांना पाहणी व कार्यवाही करण्याचे निर्देश द्यावेत, अशी आग्रहाची विनंती खासदार डॉ. हेमंत सवरा यांनी पत्रात केली आहे.