शिरगावात ‘ग्लोबल कोकण महोत्सवा’ची भव्य सुरुवात; १४ एकर जागेत १४०० स्टॉलधारकांना संधी

पालघर दि १९:-
ग्लोबल कोकण महोत्सव हा भव्य महोत्सव यंदा प्रथमच पालघर जिल्ह्यातील शिरगांव येथील समुद्रकिनारी १४ एकर विस्तीर्ण जागेत आयोजित करण्यात आला आहे. महोत्सवाचे संस्थापक व आयोजक संजय यादवराव यांनी दिलेल्या मुलाखतीत सांगितले की, “मुंबईमध्ये कोकण महोत्सव दरवर्षी मोठ्या प्रमाणावर भरतो. पालघर जिल्हा हा देखील कोकणाचा अविभाज्य भाग आहे. त्यामुळे आपल्या जिल्ह्यातही असा भव्य उत्सव व्हावा, हीच संकल्पना मनात होती.”
त्यांनी पुढे सांगितले की, या महोत्सवात तब्बल १४०० स्टॉलधारकांना जागा उपलब्ध करून देण्यात आली आहे. पालघरमधील छोटे उद्योजक, घरगुती व्यवसाय करणारे, महिला बचतगट तसेच हस्तकला आणि पारंपरिक वस्तू तयार करणाऱ्या कारागिरांना या माध्यमातून मोठे व्यासपीठ मिळत आहे.
आदिवासी बांधवांच्या कला-गुणांना वाव आणि प्रसिद्धी मिळावी यासाठी स्वतंत्र भव्य मंडप उभारण्यात आला आहे. येथे पारंपरिक नृत्य, लोककला आणि सांस्कृतिक कार्यक्रमांचे आयोजन करण्यात आले आहे.
आज शिवजयंती असल्याने विशेष कार्यक्रम म्हणून “जानताराज” या नाटकाचे सादरीकरण आयोजित करण्यात आले आहे. स्थानिक विद्यार्थ्यांना हे नाटक सवलतीच्या दरात उपलब्ध करून देण्यात आले असून, युवक-विद्यार्थ्यांचा उत्स्फूर्त प्रतिसाद लाभत आहे.
“पालघर जिल्ह्यात आजवर एवढ्या मोठ्या प्रमाणावर कोकण महोत्सव आयोजित झाला नव्हता. या उपक्रमामुळे जिल्ह्यातील उद्योग, पर्यटन आणि स्थानिक व्यवसायांना निश्चितच चालना मिळेल,” असा विश्वास संजय यादवराव यांनी व्यक्त केला.
समुद्रकिनाऱ्याच्या निसर्गरम्य वातावरणात भरलेला हा महोत्सव पालघर जिल्ह्याच्या आर्थिक आणि सांस्कृतिक विकासासाठी नवी दिशा देणारा ठरत आहे.अशा प्रकारचा महोत्सव पालघर शहरात प्रथमच होत आहे
__